Untitled-I

Энд админ өөрийн үзэл бодол, өнөөдөр ямар сэтгэгдэл төрснөө зах зухаас нь бичих болно.
2002 онд анх Улаанбаатар хотын өнцөг булан бүрээс цугларсан шижигнэсэн залуусын үзүүлсэн амжилтыг энд бичих нь илүүц биз ээ. Анхны 5д, Энхбаатар багшаас авахуулаад 11г Баянбат багш хүртэл бид хамтдаа хэцүү бүхнийг ардаа орхиж, бид хамтдаа жаргалтай цагаа өнгөрүүлж, бид хамтдаа хичээлээ тасалж, бид хамтдаа хөлбөмбөг тоглож, бид хамтдаа зодоон хийж, бид хамтдаа тоо бодож, бид хамтдаа хичээлээ хуулж, бид хамтдаа хамгийн шилдэг нь гэсэн нэрийг зүүсээр ирсэн билээ. Бидэн дундаас Улсын тэргүүний сурагч, хотын тэргүүний сурагч, дүүргийн тэргүүний сурагч, сургуулийн тэргүүний сурагч удаа тодорч, улсын, хотын, дүүргийн, нэрэмжит математик, хими, физик, триатлон, хөлбөмбөг, англи хэлний олимпиадын медальтнууд мэндэлж, монгол улсын шигшээ багийг төлөөлөн математик, байгалийн ухаан, триатлоны олон улсын тэмцээн уралдаанд оролцож, медаль хүртсээр ирсэн юм. Ерөнхий сайдтай уулзаж ч амжсан.
Сургууль дээр зохиогддог спорт, урлагийн тэр ч байтугай бүх хичээлээр зохиогддог тэмцээнүүдэд тогтмол өндөр амжилт үзүүлсээр л ирсэн. Манлайлал уралдаанд түрүүлж уйдаад, зодоон ч хүртэл хийж үзсэн. Гэтэл...
Нэг муу дарганцарын хүүхдийн толгой муутайн гайгаар, түүнийг нь сургуулийн төмөр нүүрийг гаргаж хассаных нь гайгаар үй олон жилийн уламжлалтай МОНГОЛЫН ТЭРГҮҮН СУРГУУЛЬ, түүний нэрийг үргэлж гаргадаг математикийн гүнзгийрүүлсэн сургалттай ангийг хаахаар шийдлээ гэж хэлжээ, тэр дээд хэдэн даргууд нь. Манай сургуулийн математикийн ангийнхан анхны олон улсын олимпиадын алтан медалийг эх орондоо авчирч, тогтмол олон улсаас медаль хүртэн, ямагт сургуулийнхаа байтугай улсынхаа нэр нүүрийг авч гардаг жишээ олон бий. Төрийн толгойд ч манай сургуулийнхан олуулаа байна.
Тэдний тайлбар гэж хөгийн, хүүхэд хуурч байгаа юм шиг. Авч хэрэгжүүлэх гэж байгаа юм нь манай дүүгийн тоглоомоо өрж байгаа юм шиг болхи гэхдээ өнгөцхөн харвал "хөөрхөн" / энд хөөрхөн гэдэг үг нь гоё сайхан гэсэн утгаар бус овоо, хөгийн, тоглоом шиг гэсэн утгаар орсон болно/ . Улсын сургуулиудад дахь бүх гүнзгий ангийг устгаж, ХУВИЙН СУРГУУЛИУДАД "л" байлгах юм гэнэ. Тэгээд бидэн шиг, өөр бусад шиг, төрийн албан хаагчийн, энгийн сэхээтэн ардын хүүхдүүд тоог, англи хэлийг, физикийг гүнзгийрүүлэн сурч болохгүй хэрэг үү. Энэ бидний буруу юм гэж үү, мөнгөгүйгээсээ болоод ирээдүй маань бүрхэг тэнгэр шиг болох юм гэж үү. ҮГҮЙ ЭЭ, тийм байх учиргүй. Бид зүгээр сууж чадна гэж үү.
Хэрвээ тооны ангийг хаавал та бид хаачих вэ?
Энгийн анги гэсэн нэрийн дор шугам зураг, хөдөлмөр үзээд хичээлээ таслан, физик, химид олон цаг суун гиюүрч суух юм уу? Аль эсвэл юу ч хийлгүй цагийг үрэн, гудамж метрлэн, тэнүүлчин болох юм уу? БИдний тэр бахархал, бидний тэр хүсэл мөрөөдөл, бидний тэр ирээдүйн гэрэлт зам хаачих вэ? Үүнийг нэг муу гажигтай хуулийн тогтолцоо, түүнийг дур мэдэн баллаж байдаг том толгойтой дарга нар шийдэх юм гэж үү? \одоогоор баталгаатай бус, аман шийдвэр ч гэсэн\ Миний хариулт үгүй. ҮГҮЙ!!! НЕТ!!! NO!!! БИ үүнийг хаана ч хэлнэ. Та нар ч хэлнэ байх. БИдний тэмцэх цаг ирсэн бус гэж үү, шударга бус бүхнийг тэвчин хэтэрхий удаан хугацаа өнгөрөөгүй гэж үү, эрс шинэчлэл хийх цаг нь ирээгүй гэж үү?
Хэрвээ сургуульд маань албан тоот бичиг ирвэл, түүн дээр нь "МГС-ыг хаав." гэсэн байвал, бид айхгүй, бид сандрахгүй, бид зүгээр суухгүй. Бид хүчтэй, сурагчид хүчтэй, ард түмэн хүчтэй гэдгийг тэдэнд харуулаад өгнө. Бид зөвхөн өөрсдийнхөө төлөө ч биш, бидний дүү нар, доод ангийнхан, бүр сургуулийнхаа түүхийн төлөө, монголынхоо ирээдүйн төлөө тэдний эсрэг зогсох болно. Би үүнийг баяртайгаар, бахархалтайгаар, зоригтойгоор хэлмээр байна. Бид хаана ч үгээ хэлнэ, бид хаана ч үргэлж хамтдаа, бид хаана ч тооны ангийнхан. Тооны ангийнхан үргэлж шилдэг нь байсан, байж ч байна, байх ч болно.