Breaking News: Macau 1:2 Mongolia [updated!!!]

2010 оны Зүүн Азийн Аварга шалгаруулах хөлбөмбөгийн тэмцээнд оролцох эрхийн төлөөх тэмцээнд оролцож байга манай хөлбөмбөгийн шигшээ баг анхныхаа ялалтыг байгууллаа. Макаогийн багтай хийсэн тоглолтонд манай баг урамтай тоглолтыг үзүүлж 2:1-ээр ялсан мэдээ дөнгөж сая ирлээ. Одоогоор дэлгэрэнгүй мэдээлэл байхгүй байгаа ба нөгөө 2 баг болох талбайн эзэн Гуамчууд Хойд Марианы арлын багийг мөн 2:1-ээр хожин тэмцээнийг тэргүүлж эхэллээ. Ингэснээр бидэнд дараагийн шатанд шалгарах боломж бий болж байгаа бөгөөд Макаочууд Гуамын багийг хожин, манай багийнхан тэмцээний сүүл мушгиж байгаа Марианы арлын багийг аль болох олон онооны зөрүүгээр хожсон тохиолдолд 2010 оны Зүүн Азийн АШТ-д оролцох боломжтой болох юм. Дэлгэрэнгүй мэдээг шуурхай хүргэх болноо.
Шинэ мэдээ дөнгөж сая бидэнд Гуамаас ирлээ. Тоглолтын эхний үе 0:0-ийн харьцаатайгаар өндөрлөсөн бөгөөд Макаогийн баг ялимгүй давуутай тоглож байсан боловч довтлогоо бүр нь манай хамгаалалт болон хагас хамгаалалтын шугам дээр зогсож байлаа. Улмаар 2-р үед манай багийн тоглолт илт сэргэн энэ жилээс Хасын Хүлгүүд багт тоглохоор болсон Х.Цэнд-Аюушын дамжуулалтаар Улаанбаатар ДС-ийн багийн тоглогч Н.Цэдэнбал 67 дахь минутанд тоглолтын салхийг хагалан, манай баг тэргүүлж эхэлсэн бөгөөд үүнээс ердөө нэгхэн минутын дараа мөн л Х.Цэнд-Аюушын хийсэн булангийн цохилтоос манай багийн ахлагч Д.Лхүмбэнгарав мөргөж гоол оруулан зөрүүг улам холдуулжээ. Үүнээс хойш Макаогийн багийн хийсэн удаа дараагийн аюултай довтлогоог манай багийн хаалгач М.Батгүн зогсоосоор байсан бөгөөд 79 дэх минутанд Ман Хоу Хо онооны зөрүүг багасгажээ. Ингээд үүнээс хойш 2 баг гоол оруулалгүй явсаар тоглолт 2:1-ийн харьцаатайгаар манай багийн ялалтаар өндөрлөсөн байна. Манай баг дараагийн тоглолтоо маргааш буюу ням гарагт Хойд Марианы арлын багтай хийнэ.